ਸ਼ੀਸ਼ੇ ਵਿਚ ਕਾਕਾ
Shishe Vich Kaka
ਸਾਡੇ ਸ਼ੀਸ਼ੇ ਵਿਚ ਇਕ ਕਾਕਾ ਏ, ਜੋ ਮੇਰੀਆਂ ਗੈਸਾਂ ਕਰਦਾ ਏ
ਮੈਂ ਉਸ ਦੇ ਹੱਥ ਕੋਈ ਚੀਜ਼ ਧਰਾਂ ਉਹ ਮੇਰੇ ਹੱਥ 'ਤੇ ਧਰਦਾ ਏ
ਮੈਂ ਹਸਦਾ ਹਾਂ ਤਾਂ ਹਸਦਾ ਏ
ਮੈਂ ਰੋਵਾਂ ਤਾਂ ਉਹ ਰੋਂਦਾ ਏ
ਮੈਂ ਬਹਿ ਜਾਵਾਂ ਤਾਂ ਬਹਿ ਜਾਂਦਾ
ਮੈਂ ਪੈ ਜਾਵਾਂ ਤਾਂ ਪੈ ਜਾਂਦਾ
ਅਸੀਂ ਦੋਵੇਂ ਖੇਡੀ ਜਾਂਦੇ ਹਾਂ ਢਿੱਡ ਖੇਡ-ਖੇਡ ਨਾ ਭਰਦਾ ਏ…
ਮੈਂ ਉਸਨੂੰ ਕੋਲ ਬੁਲਾਉਂਦਾ ਹਾਂ
ਉਹ ਮੈਨੂੰ ਕੋਲ ਬੁਲਾਉਂਦਾ ਏ
ਮੈਂ ਉਸਨੂੰ ਹੱਥ ਲਗਾਉਂਦਾ ਹਾਂ
ਉਹ ਮੈਨੂੰ ਹੱਥ ਲਗਾਉਂਦਾ ਏ
ਉਹ ਮੇਰੇ ਵਾਂਗੂੰ ਤੋਤਲੀਆਂ, ਬੜੀਆਂ ਹੀ ਗੱਲਾਂ ਕਰਦਾ ਏ...
ਕਦੇ ਘੂਰੀ ਵੱਟ ਡਰਾਉਂਦਾ ਏ
ਕਦੇ ਆਪਣੇ ਕੋਲ ਬੁਲਾਉਂਦਾ ਏ
ਮੇਰੇ ਵਾਂਗ ਹੱਥ ਹਿਲਾਉਂਦਾ ਏ
ਕਦੇ ਮੈਨੂੰ ਕੁਝ ਸਮਝਾਉਂਦਾ ਏ
ਮੈਂ ਉਹਦੇ ਕੋਲੋਂ ਡਰ ਜਾਵਾਂ, ਉਹ ਮੇਰੇ ਕੋਲੋਂ ਡਰਦਾ ਏ..
ਮੈਂ ਸ਼ੀਸ਼ੇ ਪਿੱਛੇ ਭੱਜਦਾ ਹਾਂ
ਫਿਰ ਉਸਨੂੰ ਲੱਭਣ ਲਗਦਾ ਹਾਂ
ਉਹ ਕਿੱਥੇ ਜਾ ਲੁਕ ਜਾਂਦਾ ਏ
ਮੈਨੂੰ ਨਾ ਨਜ਼ਰੀਂ ਆਂਦਾ ਏ
ਉਹ ਖ਼ਬਰੇ ਕਿੱਥੇ ਖੋ ਜਾਵੇ, ਸ਼ੀਸ਼ੇ ਪਿੱਛੇ ਤਾਂ ਪਰਦਾ ਏ…
0 Comments