Punjabi Kavita/Poem "Jung" "ਜੰਗ" for kids and Students in Punjabi Language.

 ਜੰਗ 
Jung

ਇਕ ਨੇ ਹਾਰੀ ਦੂਜੇ ਜਿੱਤੀ

ਦੋਵਾਂ ਨੂੰ ਜੰਗ ਨਫ਼ਰਤ ਦਿੱਤੀ 

ਪਿਆ ਹਮੇਸ਼ਾ ਘਾਟਾ ਸਾਨੂੰ 

ਦਿੰਦਾ ਹੈ ਇਤਿਹਾਸ ਗਵਾਹੀ 

ਜੰਗ ਨੇ ਦਿੱਤੀ ਸਦਾ ਮਨੁੱਖ ਨੂੰ 

ਲੁੱਟ-ਖੋਹ, ਨਫ਼ਰਤ ਅਤੇ ਤਬਾਹੀ

ਹੋਈ ਜਦ ਵੀ ਕਦੇ ਲੜਾਈ 

ਬੰਦੇ ਨੂੰ ਕਦੇ ਰਾਸ ਨਾ ਆਈ 

ਮੇਰੇ ਉੱਤੇ ਖ਼ੂਨ ਨਾ ਛਿੜਕੋ

ਧਰਤੀ ਮਾਂ ਵੀ ਦਏ ਦੁਹਾਈ

ਆਪਸ ਦੇ ਵਿਚ ਲੜ-ਲੜ ਮਰਦੇ,

ਕੈਸੀ ਕਰਦੇ ਬੇਪਰਵਾਹੀ.....ਜੰਗ ਨੇ ਦਿੱਤੀ…

ਬੰਦੇ ਨੂੰ ਜਦ ਬੰਦਾ ਮਾਰੇ 

ਉੱਜੜ ਜਾਂਦੇ ਮਹਿਲ ਮੁਨਾਰੇ 

ਮਿੱਟੀ ਦੇ ਇਕ ਟੁਕੜੇ ਖ਼ਾਤਰ 

ਜਾਨਾਂ ਦੇ ਗਏ ਕਿੰਨੇ ਸਾਰੇ 

ਬੰਜਰ ਹੋਜੂ ਸੋਹਣੀ ਧਰਤੀ,

ਉਗੇਗੀ ਫਿਰ ਇਥੇ ਕਾਹੀ…. ਜੰਗ ਨੇ ਦਿੱਤੀ…

ਲੱਖਾਂ ਗੱਭਰੂ ਵਾਰਨ ਜਾਨਾਂ 

ਕਿੱਡਾ ਭਰਦੇ ਹਾਂ ਹਰਜਾਨਾ 

ਇਕ ਦੂਜੇ ਵੱਲ ਕਰਨ ਬੰਦੂਕਾਂ 

ਹੈ ਇਨ੍ਹਾਂ ਦਾ ਗਲਤ ਨਿਸ਼ਾਨਾ 

ਵੈਰੀ ਨਾ ਬਣੋ ਇਸ ਜੀਵਨ ਦੇ 

ਕਰਨੀ ਛੱਡੋ ਇਹ ਕੋਤਾਹੀ .... ਜੰਗ ਨੇ ਦਿੱਤੀ